1 ноябрьдә Казанда йөзү буенча FINA Дөнья кубогы этабы старт ала

2019 елның 1 ноябре, җомга

1 ноябрьдән башлап 3 ноябрьгә кадәр Су спорт төрләре сараенда йөзү буенча FINA Дөнья Кубогының 2019 сезонда алтынчы этабы узачак. Ярышларда 50 илдән 200гә якын катнашучы катнаша. 2019 елда турнирның барлык ярышлары да 50 метрлы бассейнда уза һәм 2020 елда Токиода (Япония) узачак Олимпия уеннарына квалификация ярышлары исәбенә керәчәк.

Йөзү буенча дөнья кубогы 1988 елдан бирле FINA Халыкара су спорт төрләре федерациясе тарафыннан уздырыла һәм өч региональ кластерга (Якын Көнчыгыш, Европа һәм Азия) бүленгән җиде этаптан тора. Спортчыларга чикләнмәгән күләмдә дистанцияләр йөзәргә рөхсәт ителә, әмма иң яхшы өч нәтиҗә генә рейтинг очколарын санаганда исәпкә алыначак.